Tulisan wa pa ikahatod sa Manila

CEBU, Philippines - Napakyas ang National Bureau of Investigation-Manila paghatud ngadto sa Manila sa usa sa mga tulisang miyembro sa Flores Robbery Group nga ilang nasikop human sa engkwentro sa NBI sa Estaca lungsod sa Compostela.

Ang buhatan ni NBI-7 regional director Medardo De Limos nitumbok nga naglisod sila sa pagkuha og ticket sa eroplano kagahapong adlawa tungod kay fully booked na ang tanang flights paingon ngadto sa Manila tungod sa kasaulogan sa Kalagkalag.

Matud pa ni De Limos nga hayan sa adlaw nga Martes pa sila makahatud ni Rene Batiancila ngadto sa Manila. Si Batiancila usa sa lima ka gipasanginlang tulisan nga nagtago diha sa usa ka resort sa Compostela ug may nagpaabot nga kaso sa kaulohan.

Ang notadong grupo sa Flores Robbery Group nga gipangulohan ni Alvin Flores maoy gitumbok sa kapolisan nga maoy mitulis saRolex Shop sa Greenbelt 5 Mall sa Makati City niadtong Oktubre 18.

 Atol sa maong engkwentro napatay sila siFlores, Ritchie Hijapon, Mark Alejandro Salamanca ug laing usa nga hangtud karon wala pa mailhi. – BANAT NEWS