CEBU, Philippines - Bisan paman sa pagkamatay sa upat ka mga sakop sa Alvin Flores Robbery Group lakip ang lider nga si Alvin, pabilin gihapon ang pagpaniid sa kapolisan ug sa intelligence units sa rehiyon sa kalihukan sa mga nahibiling miyembro niini.
Si Sr. Supt. Patrocinio Comendador mibutyag nga base sa ilang impormasyong nadawat gikan sa National Capital Region human sa pagpanulis sa Greenbelt 5 Mall sa grupo ni Flores, 12 ka tawo ang nalambigit niini apan usa ang napatay.
Si Flores ug tulo ka mga kaubanan nga sila si Ritchie Hijapon, Mark Alejandro Salamanca ug laing usa ka wala pa mailhing napatay maoy labing ulahing nakalas sa maong grupo, una nang napatyan ang grupo atol mismo sa pagtulis nila sa Rolex Shop sa Greenbelt 5 niadtong Oktubre 18.
Si Comendador mibutyag nga ilaha nang gipanglantawan daan nga subling magtapok ang nahabiling unom ka mga kaubanan ni Flores ug mobalik gihapon sa pagpanulis ilabi na karong nagsingabot na ang Pasko. – BANAT NEWS