Sakop sa Akhro gipatay

CEBU, Philippines - Usa ka giingong miyembro sa Alpha Kappa Rho fraternity ang gipusil patay sa usa ka menor de edad nga miyembro sa Crips Gang pasado alas-4 sa kadlawon sa miaging adlaw diha sa McArthur Blvd. sa barangay Tinago.

Ang namatay giilang si Danilo Tuazon, 23, molupyo sa sitio Bagumbayan sa samang barangay nakaangkon og samad pinusilan sa walang bahin sa iyang lawas human pusila sa giila lang sa ngalang “Jonel” (tinuod nga pangalan gipugngan tungod sa iyang pangidaron) nga taga T. Villa St., barangay T. Padilla.

Matud pa sa kauban sa biktima nagkuyog sila uban sa mga higala gikan nga mitambong og disko apan sa kalit lang aduna silay nadunggan nga buto sa palibot.

Hinungdan nga nanagan sila aron molikay sa peligro apan nabantayan nalang nila ang biktima nga nagkadugo, matud pa nila nasigpatan ang suspetsado nga daling milakaw palayo sa maong lugar.

Ang biktima daling gidala sa Chong Hua Hospital tungod sa naangkon niining samad pinusilan sa kilid nga bahin sa iyang lawas apan gideklarar na kining dead on arrival sa mga doktor.

Matud pa ni PO2 Lou Pagara sa pakighinabi sa Banat News nga adunay kalambigitan sa panagbangi sa maong grupo ang motibo sa pagpamusil. – BANAT NEWS