Rehistrasyon sa Talisay Comelec naabtan og kaadlawon

CEBU, Philippines - Nakadlawonan ang buhatan sa Comelec sa dakbayan sa Talisay sa pagpangrehistro kagahapon aron mahatagan og kahigayonan ang tanang last minute registrants nga gustong magparehistro.

Si Corazon Moran, hepe sa Talisay City Comelec sa pakighinabi sa Banat News kagahapon mibutyag nga niadto pa untang Oktubre 31, 2009 sa tungang gabii ang kataposang adlaw sa pagpangrehistro.

Apan milapas sila sa nahisgutang oras tungod kay dunay mga nangasukong diha nagpaabot sa gawas ug gidudahan pa silang dunay ilang gipasingit nga mga nagparehistro nga wala sa linya.

Gipasabot ni Moran nga ang gituohang mga gipangsingit nilang mga tawo mao ang mga nagparehistro niadtong Oktubre 30, 2009 nga wala matiwas tungod kay naabtan sa oras ug ilahang gimandoan pagpabalik pagkasunod adlaw.

Niadtong Sabado, diha sa People’s Hall sa siyudad gipahigayon ang pagpangrehistro ug gibana-bana ni Moran nga sobra sa 100 ka tawo ang miparehistro sa kataposang adlaw, kasagaran kanila mitungha diha sa ilang buhatan alas 10:00 na sa gabii.

Sa sayo pa ang Comelec dili lang dinhi sa lokal nga level ang mihangyo sa publiko sa pagparehistro nang daan sa dili pa ang deadline, ang continuing registration gisugdan niadto pang milabay'ng tuig apan base sa kataas sa linya diha sa nagkadaiyang Comelec Office daw mao pay pagkasayod sa publiko ug nagkara-kara na karon sa pagparehistro.

Sugod niadtong Oktubre 22 hangtud 30 gipatas-an pa sa Comelec ang oras sa ilang pagpanawat og mga magparehistro sugod sa buntag hangtud sa alas 9 sa gabii, samtang matag Sabado gitapos kini sa tungang gabii.

Si Moran midugang nga ang filing of candidacy sa mga mokandidato sa umaabot nga eleksiyon sa 2010 karong Nobiyembre 20 hangtud sa 30, 2009. - – BANAT NEWS