CEBU, Philippines - Mas naleksyon na ang publiko karon sa pagsaulog sa Kalagkalag gumikan kay nimenus na ang nasakmitan og mga gikunsiderar nga ‘kontrabando’ sa mga sam-ang.
Dili susama sa mga nangaging katuigan, namatikdan kagahapon nga gamay ra kaayo ang nasakmit o nakumpiskar nga mga mahait nga hinagiban, ilimnon, baraha ug sound system sa mga nanuaw sa mga pampubliko ug pribadong sam-ang sa dakbayan.
Dugang pa niini nga hapsay ug malinawong sistema sa mga entrance ug exit sa mga sam-ang gawas lang sa pipila nga mga nangasaag sa agianan gumikan sa kahuot sa mga midagsang tawo ilabi na diha sa Carreta ug sa Calamba Cemetery.
Ang kapolisan nakatala og duha ka mga kasamok sukad niadtong milabay'ng gabii ug kagahapon diha sa Chinese Cemetery ug sa luyong bahin sa Carreta Cemetery tungod sa tawong nagpasalba og armas ug sa komosyon mugna sa ginukdanay sa mga polis ug mga nagtigbakay sa may Hipodromo.
Hinuon wala kini kalambigitan sa seguridad sa mga sam-ang matud pang Cebu City Police Office director, Sr. Supt. Patrocinio Comendador.
“Everything is ok. Nagkagubot ra man to kay gidakop (tigbakay) ug wala toy kalabutan sa overall peace and order atmosphere. It is a balance of maintaining the peace and enforcement of the laws,” pasabot pang Comendador.
Si Police Regional Office -7 director, Chief Supt. Lani-O Nerez sa milabayng adlaw'ng Sabado misuroy na sa mga sam-ang sa Sugbu aron pagsusi sa preparasyon sa kapolisan alang sa kalag-kalag.-– BANAT NEWS