Ulo sa 4-anyos napisat sa bus

CEBU, Philippines - Patay diha-diha ang usa ka 4-anyos nga batang lalake human ang ulo niininalatayan sa ligid sa Ceres Bus kagahapon sa hapon sa sitio Unggal, barangay Bulok-bulok lungsod sa Barili.

Ang biktima giila sa mga polis nga si Stephen Trinidad, residente sa maong lugar samtang ang drayber sa nahisgutang bus nga nagtangag sa plakang GWK-530 ug dunay body number nga 8900, mao si Pablito Timplado, 42-anyos taga barangay Pardo dakbayan sa Sugbo, boluntaryong mitahan ngadto sa mga polis ug nagtingkagol karon sa Barili detention cell.

Si Chief Inspector Alexander Soledad, hepe sa Barili Police Station sa pakighinabi sa Banat News kagahapon nagkanayon nga base sa ilang pasiunang imbestigasyon gikan ang bus sa dakbayan sa Sugbo paingon ngadto sa lungsod sa Moalboal.

Apan pag-abot diha sa nahitaboan kalit lang nga mitabok sa karsada ang bata ug maayong pagkapasok sa ulo niini sa pangunahang ligid sa bus hinungdanggrabeng kadaot nga naangkon niini. Matud ni Soledad nga ang biktima uban sa iyang ginikanan diha sa pikas karsada padulong na untang motabok sa atbang pauli sa ilang balay.

Gihulagway ni Soledad nga kurbadahon ang karsada sa lugar ug tungod sa ka gamay usab sa bata wala kini makita ni Timplado ug mao na lay nabantayan niini nga daw may mibuto sa tuong bahin sa atubangan sa ligid sa sakyanan. Si Timplado ang gikatakdang pasakaan og kasong reckless imprudence resulting to homicide.

Usa ka tinubdan nga residente sa nahisgutang lugar kinsa nagdumili sa pagpahingalan mibutyag sa Banat News nga ang biktima uban sa amahan niini kinsa giingong nakainom ug nipalit og softdrinks diha sa usa ka tindahan sa daplin sa karsada ug naggunit sa laing batang lalake nga igsuon sa biktima.

Ug dihang paingon na silang motabok sa pikas karsada ang biktima wala maguniti sa iyang amahan ug mikalit lang kini og tabok ug naatlang miabot ang maong bus. – BANAT NEWS