CPPO nag-una sa kampanya Kontra Boga

CEBU, Philippines - Ang Cebu Provincial Police Office (CPPO) maoy nag-una nga daghan og achievement sa mga unit sa kapolisan dinhi sa Central Visayas kalabot sa kampanya sa gobyerno batok sa mga armas nga walay lisensya.

Kini maoy giklaro ni Chief Supt. Lani-O Nerez ang hepe sa Police Regional Office (PRO-7) human sa iyang pagbisita sa buhatan sa hepe sa kapulisan sa lalawigan nga Sr. Supt. Jesus Gaquing niadtong Huwebes sa buntag diin gi-presentar sa CPPO ang mga armas nga ilang nasakmit atol sa nagpadayong kampanya nga mao ang Kontra Boga ug Bilang Boga.

Si Nerez nagkanayon nga ang CPPO dunay 493 ka armas nga nasakmit niining kampanya nga Kontra Boga, samtang dunay 489 ka mga armas sa ilang kampanya sa Bilang Boga ug nakuha niini ang kota nga 5:%.

Kini tungod kay sa kinatibuk-an, sukad ilusad ang amnesty program sa PNP niadtong Hulyo 1 mokabat na sa 982 ang tanang nahipos nga armas sa CPPO.

Basi sa mga gisumiter nga report sa ubang police unit sa Central Visayas, giklaro ni Nerez nga ang CPPO maoy nag-una sa daghang nasakmit nga mga armas de fuego.

Ang mga estasyonan sa kapolisan nga nakahipos og daghang armas de fuego nga gitahan sa ilang mga tag-iya mao ang dakbayan sa Danao nga may 39, Toledo 36, lungsod sa Balamban 33, ug 30 gikan sa dakbayan sa Talisay.

Samtang dunay mga lungsod sa probinsya sa Sugbu nga nakahipos lang og tagsa ka armas nga gitahan sa mga tag-iya niini sama sa lungsod sa Oslob, Tabogon, Samboan, Aloguinsan, San Remegio, Santander, ug Pilar.

Matud pa ni Nerez nga kadtong mga hepe sa kapolisan nga luya kaayo o dyutay ra og mga armas nga nasakmit, malagmit relibohan sa ilang puwesto. – BANAT NEWS