Anak ni Ople mag-senador sa 2010

CEBU, Philippines - Kabag-ohan sa balaod sa pamuo ang gidamgong iduso sa anak ni anhing Senador Blas Ople nga si kanhi Labor Undersecretary Susan “Toots” Ople sa mosunod nga administrasyon human sa 2010 nga eleksiyon.

Si Ople dinhi sa Sugbo kagahapon aron mohatag og pinaskuhan sa 50 ka pamilyang Aeta nga anaa manimuyo sa South Poblacion , Naga, lalawigan sa Sugbo.

Matud ni Ople sa dihang gikahinabi sa mga tigbalita nga kinahanglang pakusgan ang mga polisiya sa kagamhanan nga maghatag og daghang trabaho sa mga Pilipino aron dili mapugos paggawas sa nasud ug mabiktima hinuon sa mga ‘human trafficker’ nga naglihok sa tibuok kalibutan.

Gitinguha usab ni Ople nga matan-aw og balik ang balaod nga nagtugot og ‘contractualization’ nga nakapa-alkanse sa mga trabahante. Gitataw niya nga kun ubos lamang sa kontrata ang pagpanarbaho, ang trabahante dili makaplano sa pamilya tungod kay wala kini ‘security of tenure.’

Kun mahatagan og kasegurohan ang pagpanarbaho, nagtuo usab ang anak sa bantugang senador ug nagsulat sa kasamtangang Labor Code of the Philippines nga dili mopugos ang mga Pilipino nga mogawas sa nasud aron manarbaho.

Kun modagan, si Ople miingon nga pilion niyang mapa-ubos sa landong ni Senador Francis ‘Chiz’ Escudero kay mao kini ang nakig-estorya kaniya kalabot sa iyang mga kampanya kalabot sa pamuo ug OFWs.

Si Ople miingon nga tungod sa kawad-on ug ka walay tarong trabaho dinhi, aduna nay pipila nga nabiktima sa mga ‘human trafficker’ ug nangapriso sa gawas sa nasud.

Gihimong sanglitanan ni Ople ang nahitabo sa usa ka Pilipina nga gi-hire sa usa ka Nigerian aron patrabahuon isip domestic helper sa Peru, apan napriso human kini gihimong courier sa maong Nigerian sa gipalusot niini nga cocaine.

Laing biktima niini mao ang limousine driver sa Saudi Arabia nga si Jonathan Bigas kinsa gibilanggo sa mga Arabo tungod sa pagmaneho og sakyanan nga ang pasahero nakonbikto sa kasong paghupot og ilegal nga drugas.

Nanawagan si Ople sa Department of Foreign Affairs paggahin og pundo aron mapa-repatriate si Bigas.

Si Bigas makagawas na unta sa prisohan sukad niadtong Agosto 2008, apan padayon kining gitanggong tungod kay wala kini tiket pabalik sa Pilipinas. Aduna na unta kini tiket, matud ni Ople, apan wala itug-an sa kapolisan sa Saudi hangtod na-expire nalang kini.

Si Bigas mismo ang mipadala og sulat ngadto sa Blas F. Ople Policy Center, usa ka NGO nga gitukod ni Susan aron pagtabang sa mga OFW nga nagkalisod sa gawas sa nasud.

Atol sa pagduaw sa Aeta community sa Naga, misaad si Ople nga magdala og school shoes, libro ug notebooks sa mga batang Aeta nga nagtungha ubos sa Alternative Learning System sa Department of Education.

Kauban ni Ople sa pagduaw sa maong komunidad si DepEd district superintendent Caridad Labe. – BANAT NEWS