BMW Bigbike 'gipalusot' nasakpan

CEBU, Philippines - Gikonpiskar sa mga sakop sa Bureau of Customs Enforcement and Security Service (ESS) Customs Police Division ang usa ka BMW Big Bike, generator set ug hydraulic compressors nga gi-smuggle gikan sa Germany sa milabay’ng semana.

Matud pa ni ESS-CPD Cebu District Commander Captain Jerry Arizabal miabot ang usa ka 20-footer van gikan sa Hamburg, Germany diin ang tag-iya sa maong kargamento mao si Jockel Andelyn sa barangay Caubang, Leyte. Gideklarar nga mga ‘personal effects’ ang kargamento ni Andelyn apan wala maapil sa pagdeklarar ang BMW Big Bike, generator set ug duha ka mga compressors. Ang tanan gibanabanang mokantidad og sobra P1 milyon.

Si SA1 Robert Terence Monteño mikonpirmar atol sa iyang pag-inspeksiyon sa kargamento nga wala malakip sa deklarasyon ang tulo ka butang nga giingong nakalapas sa Tariff and Customs Code of the Philippines.

Gumikan niini, si Capt. Arizabal mirekomendar ngadto kang Cebu Customs District Collector Ricardo Belmonte sa pagluwat og Warrant of Seizure and Detention (WSD) batok sa mga kargamento. – BANAT NEWS