Oil companies ireklamo ni Cuenco

CEBU, Philippines - Modangop sa Malacañang si Kongresista Antonio Cuenco sa habagatang distrito sa siyudad sa Sugbo aron ireklamo ang gihimong pagpasaka sa presyo sa mga produktong petrolyo sa mga oil companies dinhi sa Sugbu.

Sumala pa ni Cuenco nga sobra ra kaayo ang gipasakang P2 sa presyo sa krudo sa matag litro, P1.25 sa gasolina ug P1.50 sa kerosene.

Matud pa sa kongresista nga ang gihimo sa mga oil companies sama ra nga gipakang ang alkanse niini sa pagtuman sa Executive Order No. 839 nga giisyu ni Presidente Gloria Arroyo nga pakubsan ang presyo sa petrolyo sa Metro Manila nunot sa kalamidad nga nanghitabo.

Si Cuenco nagkanayon nga iyang isumbong sa buhatan ni Presidente Gloria Arroyo ang gihimo sa mga oil companies aron makahimo kini og lakang aron maundang ang pagpiit sa mga oil companies sa mga konsumedor sa Sugbo.

Samtang gisaad usab sa kongresista nga iyang kontakon ang House of Representatives Committee on Energy nga gipangulohan sa anak sa presidente nga si Kongresista Mikey Arroyo aron mopatawag og emergency meeting labot sa maong report.

Buot ni Cuenco nga ipatawag ang mga opisyal sa mga dagkong kompaniya sa lana sa nasud aron pangayuan og pagpasabot sa basehanan sa laing pagpa-usbaw sa presyo sa petrolyo dinhi sa Sugbo, dungan ang EO 839.

Si Cuenco nanawagan usab ni Gob. Gwendolyn Garcia, Mayor Tomas Osmeñ ug ubang mga lokal nga opisyal sa siyudad ug sa lalawigan sa Sugbo nga mopahigayon og protesta batok sa mga oil companies.

"Grabe na kaayo kining pagdaugdaog sa mga Cebuano," ang kongresiata. – BANAT NEWS