Desisyon sa Comelec bias - Magdalo

CEBU, Philippines - Gihulagway sa Grupong Magdalo ang desisyon sa Comelec Second Division pagbasura sa ilang petisyon aron mamahimong regional political party nga di patas, wala sa lugar ug daghang buslot.

Sa gipadalang kopya sa pamahayag sa Magdalo dinhi sa Banat News, ang tigpamaba niini 1Lt. Francisco Ashley Acedillo misaysay sa mga rason sa ilang kasagmuyo sa desisyon.

Matud pa niini, gikwestyon sa Comelec ang motibo sa pagkatukod sa Magdalo Para sa Pagbabago apan wala kini gibase sa ebidensya kundili mga pagduda lang.

Daw giunhan na niini (Comelec) ang korte nga padayong naghusay sa kaso sa mutiny diha sa Makati sa pag-ingon nga migamit ang grupo og bayolenteng pamaagi ug nagpakitang supakero sa balaod.

Tungod niini gihulagway sa grupo nga gilapas na sa Comelec ang Konstitusyon nga nagsigurong ang mga akusado pabiling isipong inosente hangtud nga mamatud-an sa korte nga sad-an. Ang Oakwood Mutiny niadtong 2008 sa Makati nakakuha og dakong atensyon sa nasud tungod sa pagbutyag sa mga miyembro sa Magdalo nga gilangkuban sa mga opisyal sa AFP ug enlisted personnel sa kurapsyon ug hiwing sistema sa pangagamhanan.

Sa resolusyon sa Comelec mipadayag sa pagdudang gamiton unyang paagi ang pagkahimong political party sa grupo aron makaagni pa og ubang miyembro, dugang pa niini nga wala pa gihapon magbasol ang mga miyembro sa ilang gihimong mutiny.

Gikwestyon karon ni Acedillo ang pagtugot sa Comelec sa mga walhong partido bisan kadtong mga nailhan nang tigpaluyo sa New Peoples Army nga na-accredit isip political parties, apan ang Magdalo, kansang mga sakop mga kanhi miyembro sa Armed Forces of the Philippines ug sibilyang supporters mao na hinuoy dili tugutang mamahimong political party.

Matud pa niya nasayop ang pagduda sa Comelec nga mang-recruit lang og miyembro ang katuyoan sa Magdalo sa pagsulod sa politika sanglit mahimo nila kini bisan sa sekretong paagi.

Ang pagsalmot sa Magdalo sa political process nagpakita lang sa sinseridad sa grupo nga ipadayon ang ilang gitinguhang reporma pinaagi sa malinawong proseso ug kini makab-ot lang pinaagi sa pagsalmot sa eleksyon, matud pa sa pamahayag.

Dugang pa niya nga mas angayang ang Comelec pa maoy manguna og agni sa Magdalo nga moapil sa political process imbes nga talikdan ug pasagdan ang grupo.

Nunot sa maong mga buslot, naglaraw ang grupo nga moapelar sa Comelec pag-reconsider sa desisyon. – BANAT NEWS