CEBU, Philippines - Gumikan sa kalangay sa pagpasulod sa mga sakop sa media ug sa kapaspas sa pagpamiya sa mga sakop sa National Bureau of Investigation sa compound diin mahitabo ang ‘shootout’ tali kanila ug mga gidudahang miyembro sa Rolex Gang pinangulohan ni Alvin Flores mitumaw ang pagdudang ‘rubout’ ang nahitabo.
Apan kini hingpit gihimakak sa director sa NBI-7 nga si director Medardo De Limos sa interbyu sa mga tigbalita kagahapon ug miinsister nga walay iregularidad sa ilang gihimo, pamahayag nga gidasunan usab sa director sa Police Regional Office-7 nga si Chief Supt. Lani-O Nerez.
Si De Limos nagkanayon nga mi-coordinate silang daan kang Cebu Provincial Police Office director Jesus Gaquing before sa ‘jump-off’ ug duna sad sila'y suwat nga gipadala sa hepe sa Compostela police ug Danao Police kabahin sa ilang operasyon.
Ang NBI nagbitbit og warrant of arrest tungod sa kasong robberies batok sa grupo ni Alvin Flores gikan sa Makati Regional Trial Courts human masutang diha magtago ang grupo. Ang grupo ni Flores maoy gidudahang responsable sa pagpanulis sa Rolex Shop sa Greenbelt 5 Mall niadtong Oktobre 18 sa Makati City, usa kanila ang namatay sa maong pagpanulis.
Ang nangamatay kauban ni Flores mao sila si Ritchie Hijapon, taga Santa Fe, Cebu; Mark Alejandro Salamanca ug usa ka wala mailhing kauban sa grupo. Samtang ang nadakpan mao si Rene Batiancela.
Ang mga residente ug mismong ang mga sakop sa media nahibulong sa mga ahente sa NBI nga nagsuot og mga bonnets diha sa sulod human na sa butobuto apan nagdumili dayon pagpasulod sa mga mediamen.
Apan si De Limos mirason nga dunay mga ahente sa NBI nga di nila buot nga mailhan sa publiko tungod kay duna pay mga kaubang miyembro ang Flores Robbery Group nga ilang gipangita dinhi sa Central Visayas.
Laing gikahibulungan sa mga mediaman mao ang kalimpyo na sa crime scene ug wala nay mga basiyo sa bala ingon man bisan buslot sa mga igo sa bala kun duna may nahitabong shootout diha sa sulod.
Matud pa sa NBI na-recover nila ang usa ka M16 Armalite Rifle duha ka .45 caliber pistol ug usa ka KG-9 Submachine Pistol.
Matud pang De Limos nga gikan sa Samar ang grupo ni Flores ug naabot dinhi sa Cebu niadto lang adlaw'ng Domingo ug diha nangabang sa maong beach house. Si Ruel Bolivar, team leader sa NBI-Manila nagkanayon nga gisundan na nila sila si Flores gikan pa sa Luzon diha agi sa Sorsogon padulong sa Samar hangtud dinhi sa Sugbu niadtong Martes.
Matud pa niini sa mga tigbalita dihang ila nang i-serve ang warrant of arrest batok sa grupo kalit silang gipabuthan sa grupo hinungdan nga nahitabo ang shootout.
Apan si Dr. Rene Cam sa NBI-7 miingon nga maong wala dayon pasudla ang mga sakop sa mediam tungod kay nagpadayon ang pagpahipos nila sa ebidensya kay di sila buot nga masudlan og mga tawo ug maguba ang crime scene, ug dihang nasiguro na nilang nakuha na nila ang tanang importante, gitugutan na nilang makasulod ang mediamen ug Compostela police. Ang mga nangamatay sagad may igo sa samad pinusilan diha sa ilang mga ulo ug kalawasan ug gipailawom na sa paraffin test sa NBI Medico Legal. Samtang si Batiancela gikatakdang dad-on ngadto sa Manila aron paatubangon sa mga kasong gipasaka batok kaniya.
Sa iyang bahin, walay nakitang kahiwian si Police Regional Office (PRO-7) Chief Supt. Nerez sa kapulisan sa lungsod sa Compostela ug sa Cebu Provincial Police Office (CPPO) nga wa gilayon makaduso’g report sa headquarters labot sa engkwentro.
Si Nerez mipasabot sa maong rason ngadto ni PNP Chief Director General Jesus Versosa Jr. nga giingong nasuko human si Presidente Gloria Macapagal Arroyo pay mipahibalo kaniya bahin sa hitabo.
Samtang atol sa hitabo usa ka sakop sa Compostela police station nga si PO3 Renato Prieto ang napiit sa gate sa beach house human madasmagi sa sakyanan sa NBI atol sa ilang pagbiya sa lugar.
Ang maong polis nga unipormado niadtong tungura nasagmuyo sa mga sakop sa NBI tungod sa wala gani pagpakabana sa iyang pagkapiit gawas lang sa paghunong sa sakyanan dihang gibukbok na sa mga tawo ang sakyanan pagkakitang napiit siya (Prieto).
Si Prieto usa sa mga unang miabot nga miresponde ug miabag sa crowd control diha sa gawas. – BANAT NEWS