Duha ka tawo nagtibi kay gitulis

CEBU, Philippines - Nagtibi ang duha ka tawo nga gitulisan og P20 mil sa duha ka tulisang de motor didto sa barangay Guinsay, siyudad sa Danao, niadtong Huwebes sa alas 4:15 sa hapon.

Ang biktima mao si Michael Tibor, minyo, nga taga dakbayan sa Mandaue, usa ka ahente sa mga pahumot, ug si Roldan Villahermosa Maraga, 29, ulitawo , nga taga barangay Estaca, lungsod sa Minglanilla nga maoy nagmaniho sa delivery van nga gikargahan sa mga produktong pahumot ug mga gamit sa panimalay.

Si SPO3 Arestio Espina sa Danao City Police Station mibutyag sa Banat News nga ang mga biktima gikan sa dakbayan sa Sugbo ug paingon nga naghatod sa ilang mga baligya ngadto sa ilang mga suking tindahan sa amihanang kalungsoran.

Dihang sa pag-abot nila sa maong lugar, ilang gi-parking ang ilang sakyanan sa daplin sa karsada sa Guinsay kay namahuway sila, kalit lang mihunong ang usa ka motorsiklo nga gisakyan sa duha ka wala hiilhing mga tawo.

Diha-diha sa pagkanaog sa duha, milanit kini sa ilang kutsilyo dungan sa pagti-on ngadto sa mga biktima ug mipahibawo nga tulis.

Walay nahimo si Tibor gawas sa pagtugyan sa bag nga maoy gisudlan sa mikapin P20 mil nga ilang koleksiyon ngadto sa maong mga tulisan.

Ang mga biktima nagtibi nga misumbong sa kapolisan sa dakbayan sa Danao. - Darrel A. Carumba (BANAT NEWS)