Pink nga lungon pabarugon sa menteryo

CEBU, Philippines - Usa ka pink nga lungon ang pabarugon didto sa menteryohan sa dakbayan sa Talisay ugma hangtod sa Lunes.

Ang maong lungon nga pabarugon didto sa Cebu South Memorial Garden (CSMG) iya sa Saint Peter Funeral Homes (SPFH) isip pasundayag nila sa kasa-ulogan sa All Souls Day ug All Saints day .

Sa pakighinabi sa Banat News kang Arlene Jacalan, manager sa SPFH sa P. Burgos Street branch niini, iyang gibutyag nga ang maong pink nga lungon adto gyud pabaroga sa kinataliwad-an sa menteryohan sa CSMG.

Matud pa ni Jacalan nga sa maong lungon nga may igong gidak-on mahimong posinganan sa mga katawhan nga gustong magparetrato sulod sa maong lungon,

Kini dili pagpangandoy nga ikasulod sila og lungon kundili aron lang sa pagsukod sa bation sa tawo kun anaa siya sulod sa lungon.

Gipasabot ni Jacalan nga dili angayang kahadlokan ang lungon kay mao kini ang permanenting pahuwayanan sa mga tawong mamatay, ug “kitang tanan mamatay gyud”, matud pa niya.

Kutob sa gustong magparetrato sulod sa lungon ila kining pasudlon sa maong lungon unya paminawon nila kun unsay bation niini samtang anaa sila sulod niini.

Dugang pa ni Jacalan nga ang maong lungon magamit sa mga tawo nga walay bayad sulod sa duha ka adlaw nga kasaulogan sa adlaw sa minatay.

Miingon si Jacalan nga mao kini una sa iyang matang nga himoon nila dinhi sa Sugbo nga may kalabtanan usab sa kasaulogan sa death care week gikan niadtong Oktobre 27 hangtod sa Nobiyembre 2 diin pipila sa ilang kalihukan mao ang pagpanghinlo sa mga menteryohan.

Ang pink nga lungon nga ipabarog sa CSMG usa ka proyekto sa Saint Francis Funeral Homes nga dumalahon ni Mhay Ricardo, ang manager sa maong punerarya sa dakbayan sa Talisay. - Lesley Caminade (BANAT NEWS)