Tulisang mag-van nakabiktima nasad

CEBU, Philippines - Tulisang magsakay og van nga namiktima og gasolinahan subling nakaigo sa usa ka babaye ug lalaki kagahapon sa kaadlawon diha sa dalan Gov. Cuenco Ave.

Duha ka wala mailhing lalaking nagsakay sa kolor puting Hi-Ace Grandia van maoy gitumbok ni Benjie Conchas nga maoy mitulis kaniya samtang nagbaklay sa nahisgutang lugar.

Ang biktima mitug-an sa kapolisan nga kalit mihunong ang tulisan diha sa iyang tungod ug miabli ang pultahan dayon ang usa sa mga sakay mition kaniya og wala matinong armas ug mideklarar og tulis.

Sa kahadlok nga pusilon wala na siya mopalag dihang gikuha ang iyang P1,000 ug human niini daling mipasutoy ang mga tulisan palayo.

Dangtan pila ka gutlo, laing dalaga na usab nga giilang si Christ Cille Gegremosa, 29, mao unta’y gisuwayan og tulis sa susamang van diha gihapon sa maong dapit, apan walay nakuha ang mga tulisan tungod kay nakadagan ang dalaga.

Usa ka gwardiya sa usa ka gasoline station duol sa nahitabo-an nakasigpat sa plate number sa van nga gisakyan sa tulisan ug kini nahibaw-ang may pagkaparehas sa plate number sa van nga gireklamong nagpagasolina sa S. Osmeña sa miaging Lunes apan gitionan ang pumpboy ug misutoy nga may plakang YFT-678, samtang ang van nga mitulis kang Conchas nagtangag og plakang YFE-678.

Sa nahitabong sunod-sunod nga pagpanulis nagduda si Sr. Insp. David Señor, hepe sa Mabolo Police Station nga gikahinabi sa Banat News nga posibleng usa ra kini ka grupo.

Nagpatabang na sila karon sa Land Transportation Office-LTO aron pag-ila kun si kinsa ang tag-iya sa maong sakyanan.    (Lesley Caminade)     (BANATNEWS)