PRO-7 alerto na sa kalag-kalag

CEBU, Philippines - Gibutang sa heightened alert ang kapulisan sa lalawigan sa Sugbu sugod sa alas 8:00 sa buntag ugmang adlawa isip kabahin sa ilang pagpangandam sa pagpatuman sa seguridad sa pagsaulog sa kalagkalag.

Si Police Regional Office (PRO-7) Chief Supt. Lani-O Nerez mimando sa ginsakupan nga i-deploy ang mga polis ugma palang buntaga sa mga dagkong terminal, pantalan, nag-unang sam-ang sa lalawigan.

Dunay ipamutang nga police assistance centers sa mga sam-ang ug terminal aron maduulan sa publiko sa bisan unsang reklamo.

Gibutyag ni Sr. Supt. Jesus Gaquing, director sa Provincial Police Office nga duha ka platoon sa Regional Mobile Group (RMG-7) ang moabag sa nagkadaiyang police stations sa mga component cities ug lungsod.

Samtang ang ubang mga pwersa sa kapulisan sama sa Special Reaction Units (SRU) ang naka-standby lang nga maoy mo-augment niadtong mga lugar kun dunay mga kagubot.

Samtang ang mga sakop sa kapulisan sa dakbayan sa Sugbu mosugod na usab sa ilang pag-deploy og mga polis sa mga nag-unang mga sam-ang pampubliko dinhi sa dakbayan.

Si Sr. Supt. Patrocinio Comendador maoy mangunay sa pag-roving sa nag-unang mga sam-ang karong sayo sa buntag aron pagsusi sa pagpangandam.

Subling gidili ang pagdala og ilimnong makahubog, mga bladed weapon, mga sound system nga makasulod sa mga sementeryo, ingon man mapugngan ang mga kiriwa’g kamot nga makabiktima sa publiko. (Guam Logroño)   (BANATNEWS)