Peras wala na molista sa sked sa Ecleo case

CEBU, Philippines - Bisan og dili pa final ang pag-inhibit sa kaso ni PBMA supreme leader Ruben Ecleo Jr, si RTC-7 branch 10 Judge Soliver Peras wala na milakip sa schedule sa kaso nga dunggon kagahapon sa hapon.

Kini bisan pa man og si Peras mitakda sa maong hearing kagahapon sa hapon.

Si Peras nga mitunga na sa korte human  nag-leave sugod kagahapong adlawa, miklaro nga ang pormal nga pag-inhibit niya sa maong kaso ug ang paghatod sa tanang mga court records sa maong kaso ngadto sa court administrator maoy hinungdan nga wala niya gidungog ang kaso.

Ang abogado ni Ecleo nga si Atty. Orlando Santandre miadto sa chamber ni Peras aron pagkonpirmar sa iyang pag-inhibit sa kaso. Sama sa intensiyon sa mga abogado sa prosekusyon, si Salatandre miingon nga moduso usab siya sa motion for reconsideration aron pag-usab sa desisyon ni Peras.

Matud pa ni Salatandre nga bisan og kaniadto nagduda siya sa korte dinhi sa Sugbo, apan iyang gitataw nga nakat-on na siya sa pagsalig niini ilabi na kang Peras nga gihulagway niini nga usa ka patas nga huwes sa pagdungog sa kaso ni Ecleo.

Samtang gipanghimakak ni   Salatandre nga kabahin sa taktika sa depensa ang pagpa-inhibit ni Peras aron mabalhin sa laing lugar ang kasong parricide sa ilang kliyente nga si Ecleo nga giakusang miunay sa pagpatay sa iyang asawa nga si Alona Bacolod-Ecleo niadtong tuig 2002.

Kini tungod kay ang Korte Suprema mibasura na sa iyang unang petisyon nga ibalhin sa Manila ang hearing ni Ecleo tungod sa pagduda nga dapig sa kihante ang korte. – BANAT NEWS