CEBU, Philippines - Nanghatag na usab og mga sakyanan ang kagamhanan sa dakbayan sa Sugbu ngadto sa mga bukirang barangay sa siyudad.
Niining higayona, 11 ka mga dumptruck ang gipang-apod-apod sa city government ngadto sa 11 usab ka bukirang barangay.
Si Bise Mayor Michael Rama uban sa pipila ka mga konsehal maoy mitugyan sa mga dumdtruck ngadto sa mga opisyal sa kabarangayan.
Ang mga barangay nga nakadawat sa mga dumptruck mao ang Toong, Buot-Taup, Sudlon I, Sudlon II, Tabunan, Pung-ol Sibugay ug barangay Babag. Lakip usab sa gihatagan og dumptruck kagahapong adlawa mao ang barangay Bonbon, Pamutan, Sinsin, ug barangay Tagbao. Matud ni Konsehal Jose Daluz nga wala nila ikonsiderar nga bukirang barangay ang Sapangdaku, Buhisan ug Kalunasan hinungdan nga kini wala malakip sa listahan.
Apan gitataw ni Daluz nga makadawat gihapon ang maong mga barangay og bus nga i-apod-apod usab sa siyudad ngadto sa ubang barangay.
Nagkanayon ang konsehal nga mokapin sa P10 milyones ang gigahin sa kagamhanan sa dakbayan alang sa nahisgutang mga dumptruck.
Kahinumduman nga ang city government nanghatag usab og mga patrol vehicle niadtong miaging adlaw ngadto sa 11 ka police station sa dakbayan. – BANAT NEWS