Mipatay sa driver mitulis sa pasahero dakpan na

CEBU, Philippines - Nasikop na sa kapolisan sa miaging Martes ang usa ka menor de edad ug tulo ka mga kaubanan niini nga mipusil patay sa usa ka drayber sa traysikol ug mitulis sa usa ka pasahero niini didto sa A.S Tumulak Street. Barangay Gun-ob, dakbayan sa Lapulapu sa milabay’ng kadlawon.

 Ang nasikop mao ang usa ka 15 anyos   nga bayong-bayong nga taga Gun-ob ug nasakmitan usab kini og usa ka .38 kalibreng revolver ug usa ka bala.a

 Lakip sa nasikop mao ang mga kaubanan niini nga sila si Ronel Degolacion, 22, Joel Tumali, 21, ug manghod niini nga si Elpedio Tumali, 19, kinsa pulos ulitawo ug silingan ra sa biktima.

 Samtang ang nagpabiling nagtagotago mao si Rodolfo Cosep, hingkod kinsa gituohang nakabiya na sa maong lugar.

 Matud pa ni SPO1 Frederick Eslit ug PO3 Elmer Canillo sa Lapulapu City Police Station nga si Joel Tumali nasakmitan usab og .38 kalibre nga revolver nga adunay usa ka buhing bala, samtang ice pick usab ang nasakmit gikan kang Ronel Degolacion.

 Kahinumdoman nga mga alas 2:00 ang takna sa milabay’ng kaadlawon samtang nagpadagan si Ybañez sa iyang tricycle uban sa pasahero niini nga si Ritchie Ferrer, 32, ulitawo, ug lumad nga taga Guihulngan, Negros Oriental kalit lang gibabagan sila sa tulo ka tawo.

 Matud pa ni Ferrer nga gipusil dayon niini si Ybañez, ug dihang mosibat unta siya (Ferrer) miduol kaniya ang duha ka tawo ug mideklarar kini nga tulis hinungdan nga nakuha ang iyang bag nga itom nga adunay sud nga mga hulagway.

 Si Ybañez nga naigo sa iyang dughan dali nga gidala sa Mactan Doctors Hospital apan namatay kini human sa duha ka oras.

 Ang mga suspetsado gitanggong karon sa Lapulapu Police detention cell samtang ang 15 anyos atua sa buhatan sa DSWD. - Bong Soriano (BANAT NEWS)