Dugang carton girls sikop

CEBU, Philippines - Gitanggong sa kapolisan sa Presinto 1 sa dakbayan sa Mandaue ang lima ka mga carton girls nga naaktuhang nagpangamay og mga kustomer nga mga lalaki duol usab sa usa ka motel sa reclamation area.

Dugang kini sa duha usab ka mga cartoon girls nga nadakpan sa kapolisan sa mao gihapong lugar sa miaging semana nga gitanggong gihapon sa detention cell sa Presinto 1 sa Centro Police Station sa maong dakbayan.

Nag-estambay sa Reclamation Area ang maong mga babaye   nga nagpaabot og mga kustomer nga mga lalaki bugti usab sa pagpakighilawas nga maghapin lamang og karton diha sa ngitngit nga dapit sa Reclamation Area.

Si PO3 Rossendo Cabrera, desk officer sa Presinto 1 miingon nga ang lima ka mga babaye nga sagad nagpanuigon og 30 anyos paubos   nasigpatan sa mga polis nga nagpatrolya sa maong lugar.

Matud pa niya unang gidala ang maong mga dinakpan sa Presinto 2 sa Subangdaku Police Station apan tungod kay puno man kini sa mga lalaki nga natanggong usab tungod sa mga kalapasan nga paghubog-hubog.

Si Chief Inspector Eduardo Castañeda, hepe sa Subangdaku Police Station miingon nga ilang gipadayon ang pagpatrolya sa Reclamation Area aron bantayan ang kahusay ug kalinaw sa maong dapit ug masikop ang mga ilegal nga kalihukan sama sa drugas ug pagbaligya og dungog sama sa gihimo sa mga carton girls. - Romeo T. Limpangog (BANAT NEWS)