Kapolisan andam na sa kalag-kalag

CEBU, Philippines - Ang mga sam-ang sa dakbayan sa Talisay ug Mandaue gisugdan na sa pagpa-roving og mga polis aron mabantayan ang mga tawo nga moanha sa lugar nga manglimpiyo sa mga lubong sa ilang mitaliwan na nga mga minahal sa kinabuhi.

Si Superintendent Henry Binas, hepe sa Talisay City Police Station nagkanayon nga andam na ang iyang kapolisan aron pabantayon sa mga sam-ang sa dakbayan alang sa pagpabilin sa kahapsay ug kalinaw sa mga palibot niini karong adlaw sa minatay ug sa mga kalag.

Ang Talisay adunay upat ka sam-ang nga mao ang Evergreen Memorial Garden nga nahimutang diha dapit sa Cebu South Reclamation Project habig sa barangay Tanke, pampublikong mga sam-ang nga nahimutang diha sa barangay Cansojong ug Poblacion ug ang Cebu South Memorial Garden nga nahimutang diha sa barangay Mohon.

Matud ni Binas nga karong Nobiyembre 1, 2009 sa buntag dunay idestinong mga polis sa maong mga sam-ang ug magbutang sila og mga police assistance center diha dapit sa mga ganghaan aron dunay moayuda sa mga tawo nga mosulod.

Kutob sa mosulod ila kining kapkapan ug hilngon usab ang mga bag aron walay makadala og mga hinagiban ngadto sa sulod sa menteryo.

Si Binas nagkanayon nga mangayo usab sila og panabang sa mga barangay tanod ug sa mga sakop sa Talisay City Intelligence Bureau (TCIB) sa ilang pagpatuman sa kahapsay ug kalinaw.

 Ang pagpaninda og mga ilimnong makahubog diha duol sa mga sam-ang ug ang pagdala og mga sound system higpit nga gidili.

Ang hepe sa kapolisan sa siyudad miawhag sa publiko nga motabang sa kapolisan pinaagi sa pagkamabinantayon ug kung mobiya sila sa ilang mga balay paingon sa sam-ang siguradohon nga ang ilang mga appliances wala mag-ungot sa outlet ang plug niini aron kalikayan ang sunog ug siguradohon usab nga ang ilang mga balay sirado ug dili masulod sa mga kawatan.

Si Binas midugang nga tungod sa kakuwang sa mga police personnel dili sila makabutang og polis nga makabantay matag eskina sa mga lugar sa siyudad.

Samtang sa dakbayan sa Mandaue ingon usab niini ang pagpangandam ni Supt. Orlando Ualat aron ang mga sam-ang sa maong dakbayan magpabiling malinawon ug hapsay.

Ang dakbayan sa Mandaue may nagkalainlaing sam-ang sama sa Angelican Cemetery sa Canduman, Catholic Cemetery sa Poblacion, Mandaue Park sa Guizo, Mandaue Park sa Banilad ug uban pa. - Uban sa report ni Romeo T. Limpangog (BANAT NEWS)