Rugby boy Miluba sa silingan

CEBU, Philippines - Usa ka rugby boy nga nagpangidaron og 16 anyos miluba angol sa laing 17 anyos nga menor de edad nga iyang silingan didto sa sitio Silangan 2, barangay Tejero, ning dakbayan sa Sugbo sa miaging gabii.

Sumala sa kapolisan nga nagsipok lang ang ulo sa 16 anyos nga rugby boy gumikan kay wala mohatag og kuwarta kaniya ang biktima aron ibayad sa internet.

Ang suspetsado giingong nagtungha sa Grade 5 sa Tejero Elementary School apan nagbisyo na sa paghingos og rugby.

Nasayran nga ang suspetsado nagduwa sa usa ka computer nga hulog-hulogan og peso para maka-internet sa dihang nahutdan kini og kuwarta busa nangayo og kuwarta ngadto sa biktima nga bag-o lang naabot.

Apan ang biktima kinsa wala usa’y kuwarta mibalibad apan nasuko ang suspek ug gisukmag ang nawong sa biktima ug nagkabugno ang duha.

Apan sa dihang gilupig ang suspetsado milanit kini sa iyang kutsilyo ug gihansak diretso sa walang bukton sa biktima.

Gihatod dayon sa iyang mga ginikanan ang biktima ngadto sa Cebu City Medical Center samtang ang suspetsado nadakpan usab ug gihatod ngadto sa buhatan sa kapolisan alang sa imbistigasyon.  - Lesley Caminade (BANAT NEWS)