CEBU, Philippines - Wala na makakuha sa iyang daug ang usa ka lalaki human kini pusila sa usa ka tawo samtang gikatahong nagdula og hantak sa sitio puntod Alaska barangay Mambaling pasado alas-10 sa miaging gabii.
Wala na kaabot nga buhi sa tambalanan ang biktimang si Dixon Pugoy Villacorta, 22, molupyo sa maong lugar tungod sa samad pinusilan sa luyong bahin sa ulo, liog ug walang paa.
Nasayran nga ang biktima nagduwa og hantak sa nahisgutang lugar dihang kalit lang mipatim-aw ang wala mailhing tawo ug sa walay daghang pangutana gipusil si Villacorta makadaghan hangtod nga natumba.
Si SPO4 Jesus Moga, imbestigador sa Homicide Section sa mibutyag sa Banat News nga dunay mikooperar kanila ug mihingalan sa mamumuno apan dihang ilang giadto wala na kini sa gipuy-an niini.
Personal nga panagbangi ang gitan-aw karung motibo sa pagpamusil tungod kay gikatahong nagkabangi ang mamumuno ug ang biktima pipila na ka mga adlaw ang milabay. (Lesley Caminade)