Drayber gitulis, gipusil

CEBU, Philippines - Usa ka drayber sa habalhabal ang gitulis ug pagkahuman gipusil sa ulo sa iyang tulo ka mga pasahero sa barangay Cantabaco siyudad sa Toledo niadtong Domingo sa alas 11:25 sa gabii.

Ang biktima mao si Jifferson Siton, molupyo sa sitio Alimango sakop sa nahisgutang barangay, samtang padayon pa sa pag-ila ang kapolisan sa mga mamumuno.

Matud ni SPO3 Gil Lastimosa sa Toledo City Police dihang nahinabi sa Banat News gipara sa tulo ka lalaki ang biktima diha sa Lutopan ug nagpahatud sa maong lugar apan dihang nanganaog na ang tulo mideklarar silang tulis ug pagkahuman makuha ang kinitaan sa biktima gipusil nila kini sa ulo ug gidala ang Honda XRM nga may plaka nga YM-6661 sa biktima ug gisakyan pagsibat.

Ang biktima gidala sa Toledo City District Hospital apan gibalhin dayun sa tambalanan dinhi sa dakbayan sa Sugbo tungod sa kagrabe sa samad niini.

Ang kapulisan padayon pa sa ilang manhunt operation pagsikop sa tulo ka mga gikatahapan. (Darrel Carumba)   (BANATNEWS)