CCPO gihataga'g sakyanan
CEBU, Philippines - Gipang-apuran sa kagamhanan sa dakbayan sa Sugbu og tagsa ka patrol vehicle ang onse ka police stations sa siyudad.
Ang onse ka reconditioned vehicle nga mobalor og kapin sa P5 milyones pormal nga gitugyan ni Mayor Tomas Osmeña kagahapong adlawa sa hepe sa kapulisan sa dakbayan nga si Sr. Supt. Patrocinio Comendador uban sa mga station commanders.
Ang chairman sa Committee on Public Order and Safety sa City Council nga si Konsehal Augustus Pe Jr., miingon nga pinaagi sa maong mga patrol vehicle, wala nay rason nga magdumili pagtubag og alarma ang mga police station.
Sa iyang bahin, gipahimangnoan ni Osmeña ang kapulisan nga ampingan niini ang gihatag nga mga sakyanan sa kagamhanan sa dakbayan tungod kay makita diha palang sa mga sakyanan ang imahe sa matag police station.
“We always take care of the property along with the message that it will be used properly for the maintenance of peace and order,” pasalig hinuon ni Comendador kinsa nalipay sa dugang sakyanan sanglit sagad sa patrol cars sa mga presinto gubaon na. (Elly Bolonos) (BANATNEWS)
- Latest
- Trending
