Mitulis sa armas sa polis wa dakpi

CEBU, Philippines - Ang kapolisan sa dakbayan sa Talisay wala pay impormasyon nga nahipos bahin sa tulo ka tawong mitulis sa Halo-Haloan sa pamilya sa usa ka polis sa maong dakbayan niadtong Huwebes sa gabii.

Sa maong hitabo nadala sa mga tulisan ang 9mm pistol nga service firearm ni SPO2 Emmanuel Sarmiento ug mga alahas ug salapi sa pamilya niini.

Si PO3 Arnold Damasco sa Talisay City Police Station kinsa usa sa mipahigayon og follow-up sa maong hitabo, mibutyag sa Banat News kagahapon nga hangtod sa oras sa pagsuwat niining balitaa wala pa silay nahipos nga impormasyon bahin sa maong mga tulisan ug naglisod sila sa pag-ila ug sa pagsikop niini.

.Matud ni Damasco nga dako ang ilang katahap nga dili mga local boys ang maong mga tulisan tungod sa pamarog niini, ug pulos usab mga kalibre .45 nga pistola ang ilang mga armas.

Gibutyag ni Damasco nga kasagarang armas nga dad-on sa mga local nga tulisan, kalibre .38 revolver ra.

Ang mga tulisan nga mitulis nila ni Sarmiento ug sa asawa niining si Margarita, pulos mga “Tagalog speaking”, husto sa pamarog ug dagkuon og mga lawas. Si Damasco nagkanayon nga si Sarmiento kinsa nadestino sa Guadalupe Police Station, sa Cebu City Police Office (CCPO) mihangyo usab sa iyang mga kaubanang polis sa pagpangita sa mga tulisan.

Apan matud pa ni Damasco, nga ang kapolisan sa dakbayan sa Talisay magpadayon sa ilang pagpaniid tungod kay diha sa ilang hurisdiksyon mahitabo.

Kahinumdoman nga gawas sa magtiayong Sarmiento, gitulis usab ang ilang silingan nga si Marichel Sunogan sa tulo gihapon ka tawo sa mao gihapong adlaw dihang gitulis ang Halo-Haloan sa pamilya ni Sarmiento.

Busa gituohan sa kapolisan sa Talisay nga ang nagtulis sa asawa ni SP02 Sarmiento, mao ra usab ang mitulis kang Sunogan. – BANAT NEWS