Babayeng hubo nalumos sa Mambaling

CEBU, Philippines - Usa ka patay'ng lawas sa wala mailhing babaye ang nakit-ang naglutaw sa dagat nga agianan sa gagmay'ng bangka diha sa likod nga bahin sa University of Cebu sa barangay Mambaling pasado ala-una kagahapon.

Ang maong babaye gibana-banang nagpangidaron og kapin 50-anyos ug wala nay sapot sa lawas dihang nabanggalan sa mga residente.

Usa ka Justino Otom, molupyo sa maong lugar mibutyag sa mga polis nga sa sayo pa niana nakit-an pa niini ang maong babaye nga naglakaw sa may imburnal maong iyaha kining gibuyag tungod kay delikadong mahagbong diha sa tubig kay lapukon kini kaayo.

Apan giingong wala siya panumbalinga sa maong babaye ug padayon sa paglakaw diha sa kanal.

Diha nalang mahibaw-i ni Otom sa mga residente nga may babayeng nakit-ang nalumos diha sa maong kanal.

Matud pa ni PO2 Julius Mabunay sa pakighinabi sa Banat News nga ila pang pakisayran kung ang maong babayi molupyo ba sa maong lugar ug kun duna ba kini deperensya sa pangisip o ba kaha nituyo kini og pakamatay. - Lesley Caminade ( BANAT NEWS)