4 ka balay naugdaw

CEBU, Philippines - Naugdaw ang upat ka mga balay ug usa ang nadanyos sa nahitabong sunog alas 7:43 ang takna sa buntag kagahapon sa sitio Dunggoan, barangay Basak, dakbayan sa Mandaue.

Ang sunog nga gideklarar ni Chief Inspector Oscar Mayol nga 1st alarm ang nakapaukay kaayo sa mga lumolupyo nga nagtinabangay sa pagpawong niini. Si SFO3 Roy Garcia, imbestigador sa Mandaue City Bureau of Fire Protection mibutyag sa Banat News nga ang nangaugdaw nga mga panimalay gipanag-iya nila ni Gloria Aurelio, Magdalina Emano, Josepha Brejente ug Concepcion Maringuren.

Samtang natabang sa kabumberuhan og mga residente pagpawong ang kalayo nga midukot sa balay nga gipanag-iya ni Carlo Magno. Hinuon dako og natabang ang kabumberuhan pagpawong og dali sa sunog tungod sa dalan nga malutsan sa ilang fire trucks.

Gibana-banang mokabat sa P220,000 ang danyos sa maong sunog nga milamoy sa upat ka semi-concrete nga kabalayan.

Matud pa ni SFO3 Garcia base sa iyang pakisusi nagsugod ang kalayo sa panimalay ni Emano ug daling mikaylap sa kasikbit nga mga panimalay, wala pa hinuon matino kun giunsa pagsugod niini. – BANAT NEWS