Sam-ang para sa protestante idonar

CEBU, Philippines - Pakigtagboan ni Cebu City Administrator Francisco “Bimbo” Fernandez ang nagkadaiyang non-catholic leaders sa siyudad niining semanaha aron ipahibalo ang plano ni Mayor Tomas Osmeña paghatag kanila og kaugalingong sementeryo diha sa barangay Kalunasan.

Gusto ni Osmeña nga mahatagan og kaugalingong lubnganan ang mga protestante diha sa napulo ka ektarya nga Don Sergio Osmeña Shrine.

Kini human usab bisitahi ang mayor sa mga protestant leaders niadtong miaging buwan sa Agosto nga nangayo og luna sa dakbayan alang sa maong katuyoan.

Gitataw ni Fernandez nga ang tigom kabahin sa information campaign pagpahibawo sa mga dili katoliko nga kini hatagan og sam-ang sa city government.

Ipadangat usab sa city administrator ang iyang mga sugyot atol sa tigom alang sa hapsay unya nga pagdumala sa ihatag nga menteryo sa siyudad.

Matud pa ni Fernandez nga ang sam-ang mahimo nga dumalahon sa dakbayan, ipadagan sa usa ka management team sa mga protestante, o pinaagi ba kaha sa joint venture.

Nagkanayon hinuon ang city administrator nga siya maminaw usab sa sugyot sa mga non-catholic leaders alang sa hapsay nga pagdumala sa sementeryo.

“We just looking for ways kung unsaon and we are open to any suggestion, ang ato lang nga ma-discuss in a collective body,” sumala ni Fernandez.

Kini na unya ang ikaduhang higayon nga ang kagamhanan sa dakbayan mohatag og luna aron himuong lubnganan sa mga minatay sa laing tinuohan, unang gihatagan og duha ka ektaryang luna sa siyudad ang Muslim community sa Sugbo niadtong tuig 2004 nga ilang gihimong sam-ang.

Nasayran nga ang apuhan sa mayor nga si Don Sergio Osmeña, midonar usab og luna kaniadto nga gihimong sam-ang nga karon mao na ang Calamba Cemetery.

Nagtuo si Osmeña nga kung buhi pa ang iyang apuhan, kini mouyon usab sa paghatag sa siyudad og pipila ka bahin sa Don Sergio Osmeña Shrine alang sa mga protestante.  – BANAT NEWS