CEBU, Philippines - Sugod karong adlawa pakubsan na ang pletihan sa mga pasaheroang bus nga magbiyahe sa amihanan ug habagatang Sugbu sumala pa sa Land Transportation Franchising and Regulatory Board.
Ang pletihan pakubsan gikan sa P1.25 matag kilometro ngadto na sa P1.20 matag kilometro.
Kini subay sa kasabutang nakab-ot sa LTFRB-7 ug Cebu Provincial Bus Operators Association, Cebu United Mini-Bus operators ug uban pang small-time bus operators nga nag- operate sa lalawigan.
Matud pa ni LTFRB-7 regional director Romulo Bernardes nga ang kasabutan napalig-on pinaagi sa Memorandum of Commitment (MOC) sa mga bus operators niadtong Septiyembre 16, 2009 nga gisaksihan niya ug ni Cebu Governor Gwendolyn Garcia.
Nalatid sa MOC nga karong adlawa sugdan ang implementasyon sa fare reduction ug ang Land Transportation Office modakop ug mopamulta sa mga bus operators nga mosingil og mas ubos pa sa maong rate nga gikasabutan.
Ang LTFRB mipagawas og bus fare matrix nga P1.45 matag kilometro nga rate apan gumikan sa grabeng kompetisyon sa mga bus operators nagpaubsanay sila sa ilang mga rate aron mas maoy pilion sa mga pasahero hangtud nga kini naabot nalang sa P1.25 matag kilometro sulod na sa pipila ka tuig ug ang uban mipaus-os pa gyud niini og maayo.
Kini maoy hinungdan nga daghang mga bus operators ang mitiyabaw tungod kay di na makaapas sa pabaratuhay sa ilang pletihan sa ubang operators maong miabot ang reklamo diha sa buhatan sa LTFRB.
Aron maresolbar ang isyu, mipatunga ang Kapitolyo ug LTFRB. Ang LTFRB nakahuna-huna nga paubsan pa gyud og singko sintimos ang rate apan kini kinahanglang sundon na sa tanang bus operators.
Magpabilin hinuon ang P9.00 nga pletihan sulod sa unang lima ka kilometro.
Matud pang Bernardes nga bisan og undercharging ang gibuhat sa mga bus operators kaniadto di nila sila mapahamtangan og silot tungod kay nakabenipisyo man niini ang sumasakay.
Apan karong duna nay MOC, mahimo na nilang silotan ang molapas niini ug pamultahon og P1,500. – BANAT NEWS