CEBU, Philippines - Gitabangan og lugos ang usa ka 20-anyos nga dalaga nga adunay deperensiya sa pangisip sa iyang lima ka mga silingan pinaagi sa paghubog niya niadtong Biyernes sa gabii didto sa Sitio Panas, barangay Lamintak Sur, lungsod sa Medellin.
Ang biktima nga si Maricar (dili tinuod nga ngalan), giingong usa ka maanyag nga dalaga apan adunay deperensiya sa pangisip giubanan sa iyang mga kabanay nga mi-report sa Medellin Police Station human usab kini motug-an nga gitabangan sa paglugos.
Ang mga suspetsado nga gitanggong karon sa karsel sa Medellin Police Station naila nga sila si Ricky Lanurias, 30, minyo, Edison Lanurias, 25, ulitawo, Enriquito Bohol alias Donge, 20, ug Peter (tinuod nga ngalan gipugngan), 17. Ang mga suspetsado pulos tigbantay og manggahan sa barangay Lamintak Norte.
Laing suspetsado nga nailang si Roy Sabala, hingkod ang panuigon, nakasibat human sa hitabo.
Si Chief Insp. Bonifacio Arriesgado, hepe sa Medellin Police Station nagkanayon nga ang biktima positibong mitudlo sa lima ka mga suspetsado nga maoy mipulipuli paglugos kaniya ilawom sa punoan sa mangga.
Sa dihang mi-report siya sa iyang mga kabanay dali nilang gipahigayon ang follow-up operation apan naka-ipsot si Sabala ug ang upat maoy nadakpan sa manggahan.
Matud pa ni Chief Insp. Arriesgado nga ang igsuon sa biktima nga si Cherryl kinsa nagtrabaho isip katabang dinhi sa dakbayan sa Sugbo maoy nangayo og panabang sa usa sa mga konsehal sa ilang lungsod. Gihimo gilayon ang operasyon aron masikop ang mga suspetsado.
Sumala pa niini nga karong adlawa ilang dalhon ang biktima sa Vicente Sotto Memorial Medical Center-Pink Room aron ipahiling ang biktima pagsuta kun tinud-anay ba kining nahilabtan sa lima ka suspetsado.
Isunod sa kapolisan ang pagsang-at og kasong rape sa mga akusado. Matud sa hepe nga nakumpleto na ang affidavit sa biktima.
Ang biktima positibong mitudlo sa duha ka Lanurias, Bohol, Peter ug Sabala nga maoy nagtabang kaniya pag-rape human siya mahubog tungod sa gipa-inom niini.
“Kining mga suspetsado nga silingan lang sa biktima gipasidan-an pa gani sa igsuon sa biktima nga ayaw tawon ninyo binuangi akong igsuon kun mogawas og balay," sumala pa ni Chief Insp. Arriesgado.
Si Ricky Lanurias kinsa gipasanginlang maoy nagdala sa biktima sa manggahan mihimakak sa dihang gikahinabi sa DySS sa maong pangasangil.
Gibutyag niya nga si Bohol maoy iyang nakit-an nga mi-among-among sa dalaga. Wala hinuon siya makakita sa iyang mga kaubanan kun mi-among-among ba usab sa biktima. – BANAT NEWS