Panday giluba'g mananagat kritikal

CEBU, Philippines -  Kritikal ang kahimtang sa usa ka panday human kini dunggaba sa gikainom niyang mananagat kinsa iya ra usab nga silingan didto sa barangay Poblacion, lungsod sa Tabogon niadtong Biyernes sa alas 3:15 sa hapon.

Ang biktima mao si Henry Tabagan, hingkod, minyo, nga taga Poblacion ug usa ka panday samtang ang suspek mao ra usab ang iyang silingan ug suod nga higala nga si Rodrigo Canete Soon, 52 , minyo, nga usa ka mananagat. Si SPO3 Junalito Saladaga sa Tabogon Police Station mibutyag sa Banat News nga sa wala pa ang maong hitabo, ang biktima ug ang suspek nagkasabot nga mag-inom apan dihang nangalasbag na, nagkalalis ang duha.

Dihang miinit na sila pag-ayo uban sa hulhog sa gilala nilang tuba ug bino, nahutdan sa katarungan ang suspetsado busa gilanit niini ang gitangkil niyang kutsilyo ug gihansak sa walang bahin sa tiyan sa biktima.

Ang biktima nga walay praktis sa self defense wala gyud kalikay busa gitaupan gyud ang iyang kilid.

Ang daling respondi sa kapolisan maoy nakapasipong dayon sa suspetsado, samtang ang biktima gihatod usab dayon ngadto sa Vicente Sotto Memorial Medical Center sa dakbayan sa Sugbo. Ang suspetsado nagpahayahay na karon sa prisohan sa kapolisan sa Tabogon. (BANATNEWS)