Vintage bomb napukotan sa mananagat miaso

CEBU, Philippines - Hastang hadloka sa usa ka mananagat dihang atol sa iyang pagpamukot sa mabaw nga bahin sa dagat usa ka vintage bomb ang nadagit og apil sa iyang pukot ug dihang iyang gitangtang kalit nga miaso niadtong Biyernes sa gabii diha sa barangay Biasong, dakbayan sa Talisay.

Ang nahisgutang mananagat nga nakapukot og bomba mao si Edwin Bolo, residente sa maong lugar kinsa daling mitaho ngadto sa mga opisyal sa ilang barangay kabahin sa insidente.

Si Konsehal Reynaldo Bas uban sa ilang tanod nga si Redford Naranjo daling miadto sa Talisay City Police Station sa barangay Poblacion aron ipahibalo ang hitabo ngadto sa mga polis.

Ang TCPS ang dali usab nga mitawag ngadto sa provincial headquarters ug mihangyo nga mopadala og mga bomb expert kinsa sila si PO3 Reynaldo Solante ug PO2 Jupiter Almocera ang daling miadto sa lugar.

Ang bomba gipabuto na lang nila ni Solante ug Almocera sa usa sa mga lugar sa Biasong layo sa kabalayan tungod kay mabutang sila sa peligro kung ilaha pa kining dad-on ngadto sa provincial headquarters.

Kahinumduman nga ang mga bomb expert sa provincial headquarter ug Cebu City Police Office mianha sa dakbayan sa Talisay lakip na ang usa ka ordnance expert nga kanhi sakop sa US Army nga si Peter Coleman aron mokuha sa mga vintage shells ug bomba sa Lagundi Reef nga nasigpatan sa mga divers uban ni Coleman.

Ang kapolisan ubos sa hangyo ni Konsehal Shirley Belleza mi-dive sa Lagundi Reef aron sa pagpanglimpiyo ug pagkuha sa mga bomba, kapin sa 20 ka explosive ordnance ang nakuha sa maong operasyon usa ka bulan na ang nakalabay.

Ang maong mga bomba ang gituohang gilabay diha sa lugar niadto pang WWII apan delikado gihapon nga mobuto bisan pa og mga lawas napuno na sa taya.

Sumala pa sa mga polis nga kun mibuto pa ang bomba nga napukotan ni Bolo posibleng dili kini maoy makalas kundili maghatag usab kini og dakong kadaot diha sa lugar nga posibleng makaangin sa mga residente. (Brenda Batuto)     (BANATNEWS)