Negosyante gitusak og bala tipi

CEBU, Philippines - Natusak sa bala ang kalawasan ug namatay ang usa ka negosyanteng giatangan gawas sa ilang balay diha sa sitio Tabok barangay Maslog siyudad sa Danao kagahapon sa alas 3:00 sa kaadlawon.

Ang biktima mao si Ronilo Batican, 52, molupyo ra sa maong lugar ug nanag-iya og tindahan sa maong dapit, samtang ang wala pa mailhi sa kapulisan ang mamumuno sa paghimo ning balita.

Matud pa ni SPO3 Aristeo Espina sa Danao City Police dihang nahinabi sa Banat News mao palay paggawas ni Batican sa iyang pinuy-anan ug paingon unta kini sa iyang tindahan nga nahimutang sa pantalan sa maong siyudad.

Apan igo lang nakalakaw og pipila ka metros ang biktima gikan sa pinuy-anan dihang mibutho ang mamumuno ug mipusil kaniya makadaghang higayon diha sa lawas.

Human sa hitabo daling misibat ang kriminal samtang ang biktima daling gihatud sa Danao District Hospital sa mga nakamatang kabanay ug silingan sa butobuto apan gideklarar kining dead on arrival.

Ang nirespondeng kapulisan naka- recover og pito ka kabhang sa bala sa kalibre .45 ug usa ka deformed slug diha sa crime scene nga gituohang gikan sa armas nga gigamit sa mamumuno.

Ang kapulisan padayon pang nangimbestigar pagtumbok ug pagsikop sa mipatay sa biktima ug pagtino sa motibo niini nga gituohang giplano nang daan. (Darrel Carumba)   (BANATNEWS)