Magtiayon napaig sa sunog

CEBU, Philippines - Nangapaig ang lawas ug namatay ang magtiayon human gilamoy sa sunog ang ilang panimalay sa sitio Sangi barangay Pajo dakbayan sa Lapulapu kagahapon sa kaadlawon.

 Ang mga biktima giilang sila si Eugenia ug Paulo Patalinhug, pulos na mga senior citizens ug residente sa maong dapit.

Base sa pasiunang imbestigasyon ni SFO1 Atilano Berido sa kabomberohan sa Lapulapu nasayran nga bugtong ang panimalay sa mga biktima ra ang nasunog sa maong dapit nga ginama sa semi-concrete nga panimalay.

Atol sa maong sunog gidudahan ni Berido nga wala na makagawas dayon ang magtiayon gumikan sa daling pagkatap sa kalayo sa tibuok panimalay.

Ang napaig nang patay’ng lawas ni Paulo diha mapalgi sa ilang basement samtang si Eugenia diha sa ikaduhang andana sa maong panimalay nakit-an ug napaig na usab ang lawas niini.

Base sa pipila ka pamahayag sa mga kabanay sa biktima nga ang duha hinay nang makalakaw hinungdan nga wala dayon kini makagawas atol sa maong sunog.

Nasuta usab sa kabomberohan nga walay nakatabang sa magtiayon gumikan kay sila nalang maoy nagpuyo sa dakong panimalay human maminyo ang mga anak ug naglain og pinuy-anan diha gihapon sa maong compound.

Hangtod ning pagbalita wala pa masayri sa kabomberohan kung unsay hinungdan sa maong sunog apan gikatahong didto kini magsugod sa ikaduhang andana.

Samtang gibanabanang mokabat sa P150 mil ang danyos sa maong sunog nga nadawat ang alarma mga ala 1:15 kagahapon sa kaadlawon ug gipaubos sa 1st alarm sa kabomberohan dayon nakontrolar kini sulod lamang sa usa ka minuto.

 Hinuon wala na makatabok ang kalayo sa mga kasikbit nga mga panimalay sa mga anak sa biktima gumikan kay nagsentro lamang ang maong sunog sa karaang panimalay sa biktima.   (BANATNEWS)