Notadong tulisan sikop

CEBU, Philippines - Usa ka giingong tulisan nasikop sa mga polis sa dakbayan sa Talisay human kini maaktohi nga nagdala og pusil niadtong Miyerkules ug nakahatag og kahadlok sa mga residente diha duol sa Paz Beach, barangay Cansojong sa nahisgutang siyudad.

Ang suspetsado mao si James Baguio alyas “Hapon” kinsa residente sa barangay Tipolo, dakbayan sa Mandaue.

Nasakmit sa kapolisan gikan sa suspek   ang usa ka kalibre .38 nga revolver nga adunay duha ka buhing bala.

Si PO2 Roy Lofranco sa Talisay City Police Office mibutyag kagahapon sa Banat News nga si Baguio nagpuyo kaniadto diha sa maong lugar ug gikatahong mangigo kini og mga mangaligo diha sa dagat.

Apan ang mga biktima mahadlok lang sa pagtaho ngadto sa mga polis sa gibuhat kanila sa suspetsado hinungdan nga wala kini madakpi kaniadto.

Ang mga residente sa lugar ang gibati og kabalaka dihang ilang nakit-ang nagsuroy-suroy diha sa ilang dapit si Baguio nga nagtangkil og armas de fuego, mitawag dayon sa kapolisan ug sa pagkakaron nagpahayahay na sa prisohan ang maong suspek. – BANAT NEWS