Botante giawhag magparehistro

CEBU, Philippines - Ang hepe sa buhatan sa Commission on Elections (COMELEC) sa dakbayan sa Talisay, Corazon Moran miawhag kagahapon sa mga kwalipikadong mga botante sa maong syudad nga magparehistro na sa dili pa ang kataposang adlaw sa Oktobre.

Si Moran nga nahinabi sa mga tigbalita nagkanayon nga singko porsyento na lang ang gidaghanon sa wala pa makaparehistro.

Gipaniguro usab niya sa tanan nga walay mga problema nga nasugatan sa ilang pagpangrehistro.

Walay gihatag nga lugway nga adlaw sa pagparehistro kay kutob ra gyud kini sa Oktobre 31, matud pa ni Moran.

Miingon si Moran nga sugod niadtong Huwebes hangtud sa Oktobre 30 ,ang oras sa pagpangrehistro molungtad hangtod sa alas 9:00 sa gabii, apan sa Oktobre 31 hangtod kini sa tungang gabii.

Matud pa sa election officer sa Talisay nga niadtong tuig 2007 ang siyudad dunay 94,156 ka mga rehistradong botante apan sa ulahing progress report niadtong buwan sa Hunyo nasuta nga may 90,798 ang mga nakabotar

Busa mikibra kini og pipila ka libo nga gituohang ang uban kanila ang napakyas sa pagbotar o kaha mibalhin og mga pinuy-anan.

Apan niining ulahi, base sa progress report, nadugangan na usab og 8,784 ka mga botante kinsa bag-ong nagparehistro sa dakbayan.

Ang mga magparehistro kinahanglang magdala og valid nga identification card, kinahanglang Filipino citizen, ug 18-anyos ang panuigon atol sa adlaw sa eleksiyon sa Mayo 10, 2010. – BANAT NEWS