CEBU, Philippines - Ang ihawan sa dakbayan sa Talisay maoy napiling “Best Meat Establishment” sa tibuok nasud atol sa gipahigayong national competition kagahapon sa hapon didto sa Department of Agriculture Central Office, sa East Avenue, Quezon City.
Si Talisay City Veterinarian ug tagdumala sa ihawan Dr. Galileo Larawan mibutyag sa Banat News nga ang ubang mga kaatbang sa Talisay City slaughter house mao ang Moncada, Tarlac, Ordaneta City sa Pangasinan ug Tres Marteres sa Cavite.
Kahinumdoman nga sa milabay'ng mga buwan ang ihawan sa siyudad maoy napiling “Best Meat Establishment” sa rehiyon-7.
Ang maong ihawan ubos sa “AA” accreditation ug certified isip good manufacturing practice (GMP). Matud ni Larawan nga ang “AA” standard rating 61%-80%, samtang ang “AAA” standard ubos sa 81%-100%.
Apan ang ihawan sa siyudad nakakuha og 83.43% nga rating nga ubos sa “AAA” standard.
Isip best meat establishment ug sa rating nga ilang nakuha, makasiguro nga ang mga karneng giihaw gikan sa maong ihawan sa siyudad limpiyo ug walay kuyaw kaunon sa mga konsumedor.
Sa milabay'ng mga buwan ang mga representante sa buhatan sa Department of Interior and Local Government (DILG), Department of Environment and Natural Resources (DENR), National Meat Inspection Services (NMIS) ug Department of Health (DOH) sa Manila mihimo og evaluation sa maong ihawan tungod sa pagsalmot sa siyudad sa national competition.
Usa sa mga gipangayo sa maong competition mao ang GMP certification ug niadtong Hulyo 8, 2009, nasayran nga milusot ang Talisay City Slaughter House sa maong evaluation ug nahimo kining kwalipikado sa pagsalmot sa national competition. – BANAT NEWS