Polis sa Mobile luwas sa ambush

CEBU, Philippines - Nakalingkawas sa tinong kamatayon ang usa ka sakop sa Cebu City Mobile Group (CCMG) sa Cebu City Police Office (CCPO) sa dihang gibanhigan sa wala mailhing lalaki samtang nag-roving sa sitio Morga, barangay Sudlon 2, kagahapon sa alas 7 sa buntag.

Gisuwerte si PO1 Roleto Elarcosa human ang clutch lang sa iyang motorsiklo maoy naigo sa wala matinong kalibre sa bala.

Si Sr. Supt. Patrocinio Comendador, direktor sa CCPO, nagkanayon nga nagsakay si PO1 Elarcosa sa iyang motorsiklo, apan pag-abot sa maong lugar nakabati siya og sipang boto sa armas ug iyang nabantayan nga maayong pagkaigo sa bala sa handle sa clutch sa motorsiklo.

Gikataho nga si PO1 Elarcosa wala makapabuto sa iyang dalang M-16 armalite sanglit gawas nga bukid ug libonon ang lugar wala usab siya'y nakitang bisan usa lang ka tawo nga matumbok nga mipusil kaniya ug gi-report na lang niini ang insidente.

Si Comendador mipadayag nga posibleng may kalambigitan sa plantasyon sa marijuana sa nahisgutang lugar ang pagpamanhig kang PO1 Elarcosa. Daghang gipanglarot nga marijuana ang kapolisan sa nahisgutang lugar.

Matud pa ni Comendador aktibo si PO1 Elarcosa sa pagpanglarot og marijuana sa bukid. Gani, si PO1 Elarcosa hatagan ni Comendador og commendation gumikan usab sa kakugihan niini sa kampanya batok sa marijuana sa mga bukirang barangay sa dakbayan sa Sugbo.

Nasayran nga liboan na sa mga punoan sa marijuana ang nalarot sa mga sakop sa CCMG karong tuig sa mga bukirang barangay sa dakbayan diin dunay mga higayon nga gipamusil ang mga polis atol sa pagpangronda. – BANAT NEWS