Polis gidis-armahan sa mga tulisan

CEBU, Philippines - Usa ka polis gidisarmahan sa iyang service firearm sa tulo ka mga   tulisan nga nag-Tinagalog nga mitulis sa iyang establisamento niadtong Huwebes sa gabii diha sa Victoria Village, barangay San Isidro, dakbayan sa Talisay.

Gawas kanila ang ilang silingan usab giapil sa pagtulis sa mao gihapong mga tulisan mga pasado alas 7 sa gabii sa nahisgutang adlaw.

Ang mga nabiktima mao ang magtiayong Margarita ug SPO2 Emmanuel Sarmiento nga nadestino sa Guadalupe Police Station ug mga residente sa Victoria Village ug ang ilang silingan nga si Marichel Sunogan, 25. Ang magtiayong Sarmiento   tagdumala sa Victoria’s Halo-Halo nga nahimutang diha gyud sa eskina sa Victoria Village.

Base sa imbestigasyon sa kapolisan sa Talisay City Police Station pasado alas 11 sa gabii niadtong Huwebes dihang gamay na lang ang kostumer sa halo-haloan ug padulong na usab nga manirado ang mga biktimang Sarmiento kalit lang mibutho ang tulo ka nagsakay og motorsiklo ug nagpakaaron-ingnon nga mga kustomer apan usa kanila ang nagbantay sa gawas nga bahin sa tindahan samtang ang duha   miduol ngadto sa counter ug dayong tion sa ilang mga pistola nga kalibre .45 ngadto sa magtiayon.

Si Margarita sa dihang nahinabi sa mga tigbalita nagkanayon nga ang mga tulisan mimando nga paablihan ang hunos nga gisudlan sa ilang halin nga mikabat ngadto sa P9,000 ug gisakiyo kini lakip na ilang duha ka gold nga kwentas nga nagkantidad tanan og P54,000.

Matud ni Margarita nga misuway sa paghulbot ang iyang bana sa iyang service firearms nga niadtong tungora gitakin niini sa iyang hawak aron mosukol ngadto sa mga tulisan apan sa iyang kahadlok nga madisgrasya silang duha iyang gipugngan ang iyang bana ug ang 9mm pistol niini nga dunay serial # N56797Z gikuha og apil sa mga tulisan.

Gihulagway ni Margarita nga ang maong tulisan taas og pamarog, dagkuon og panglawas ug mga “Tagalog speaking”.

Sa laing bahin, si Sunogan sa dihang nagsakay kini og traysikad diha na duol sa ilang balay tulo ka mga lalaki nga nagsakay og Honda 155 nga motorsiklo kolor itom mition ngadto kaniya og pusil ug gikuha ang iyang P4,000 nga salapi.

Ang kapolisan sa siyudad natahap nga ang nagtulis sa magtiayong Sarmiento mao usab ang nagtulis kang Sunogan ug dili mga “local boys” ang nahisgutang mga tulisan. – BANAT NEWS