Lapu' hingpit nang Lone District

CEBU, Philippines - Hingpit na nga nahimong Lone Congressional District ang dakbayan sa Lapulapu human mahingpit ang balaod nga Republic Act 9726 nga gipirmahan ni Pangulong Gloria Macapagal Arroyo niadtong miaging adlaw.

Si 6th District Representative Nerissa Soon-Ruiz nagkanayon nga ang RA 9726 nga iyang giduso nahingpit na nga balaod human sa pagpirma sa presidente dungan usab sa pagpirma sa uban pa nga mga lokal nga balaudnon.

Ang Lapulapu nga usa ka highly urbanized nga dakbayan mibuwag na gikan sa ikaunom nga distrito, ang mga residente dili na makabotar sa mga kandidato sa probinsiya sa Sugbo.

Matud pa ni Ruiz nga gidapit unta niya ang presidente nga mobisita dinhi sa Sugbo sa sunod semana aron anhi himuon ang ceremonial signing sa maong balaudnon apan gumikan sa kadaghan sa gimbuhaton niini sa kaulohan didto nalang kini gipirmahan.

Ang nahibiling lugar nga sakop nalang sa ikaunom nga distrito mao ang Mandaue, Consolacion ug Cordova.

Nunot sa paghingpit na nga pagka lone district sa dakbayan sa Lapulapu naghatag na og katungod sa maong dakbayan alang sa ilang pagbaton og kaugalingong kongresista sa 2010 election.

Si Mayor Arturo Radaza sa gipadalang text message sa Banat News mihangop duyog ang mga Oponganon sa pagpirma ni Arroyo sa balaod ug giisip na kining dakong kalampusang nakab-ot sa iyang lugar.

“I join the rest of the Oponganons in celebrating yet another milestone in the city’s journey to progress with the signing into law of RA 9726 which gives our beloved Lapu-Lapu a lone legislative district in Congress,” matud pa niini.

“The city at last will have an opportunity to be heard in the national legislature and aid our city to more quality development,” dugang pa niini.

Sumala pa niya kini nangahulugang wala mausik ang mga sakripisyong gihimo sa mga taga Opon. – BANAT NEWS