Ebdane mi-resign, mag-presidente

CEBU, Philippines - Misang-at sa iyang resignasyon si Sec. Hermogenes Ebdane Jr. kagahapon isip kalihim sa Department of Public Works and Highways taliwala sa hugot nga pagduso sa mga gobernador sa Mindanao nga padaganon kini pagka-presidente sa nasud sa 2010 nga eleksiyon.

“To my fellow public servants in the DPWH, my tenure as Secretary of DPWH has become untenable. I have submitted my letter of resignation dated 15 October 2009 to OP (Office of the President,” si Ebdane nagkanayon sa iyang pamahayag kagahapon.

Gitataw ni Ebdane nga ubos sa iyang pamunoan, ang DPWH mihimo sa mga gimbuhaton bisan ubos sa kapait.

Ang kalihim nga kanhi hepe sa Philippine National Police   miawhag sa mga kaubanan niya sa DPWH sa pagpadayon sa pagpangalagad.

“I am proud to have served this DPWH whose people ‘Serve with Noble Purpose’,” matud pa ni Ebdane.

Niadtong miaging adlaw, si Ebdane mipadayag usab sa iyang laraw pagdagan pagka-presidente ubos sa administrasyon.

Kini human adunay mga gobernador sa Mindanao nga buot motuboy kaniya isip standard bearer sa administrasyon.

Usa ka kasaligang tinubdan nagkanayon nga ang kampo ni Ebdane nakigsabotsabot na karon sa mga lider sa Lakas-CMD-Kampi kalabot sa laraw sa kalihim, bisan gipili na sa usa ka tigum sa maong partido si Defense Sec. Gilberto Teodoro.

Hinuon, matud sa tinubdan nga posible nga si Teodoro i-tandem ni Ebdane gumikan kay wala mosaka ang rating niini sa mga survey. – BANAT NEWS