CEBU, Philippines - Laing empleyado sa Mactan Export Processing Zone gilugos sa kawatan sulod sa giabangang lawak didto sa barangay Pusok, dakbayan sa Lapulapu kagahapon sa kaadlawon.
Ang biktima usa ka 24-anyos, dalaga, lumad nga taga Misamis Oriental ug kasamtangang nagpuyo sa usa ka apartment sa maong dapit ug usa ka enhinyera sa usa ka kompaniya sa MEPZ.
Matud pa nilang Supt. Pedrillo Villamore, deputy director for administration ug Supt. Clifford Gairanod, deputy director for operations sa Lapulapu City Police Office, ang biktima natulog sa iyang lawak sa dihang kalit nga dunay usa ka tawo nga nagtaptap sa dagway ug mikuha sa tulo ka bildo sa jalosy sa bintana.
Sa dihang katunga na sa lawas sa wala mailhing kawatan ang nakasulod buot unta kini niyang pusposan apan naunhan siya sa pagtion sa dalang armas hinungdan nga wala siya'y nahimo.
Gimanduan ang biktima sa pagpaabli sa iyang pultahan ug misulti kini kaniya “manginabuhi (ko).”
Human makuha ang usa ka laptop, cellphone ug pitaka sa biktima nga may kuwartang wala pa mahibaw-ing kantidad, gilugos sa kawatan ang biktima.
Sumala pa sa kapolisan nga wala makasinggit ang biktima gumikan sa kahadlok.
Nagduda si Supt. Gairanod nga usa ra ka tawo ang nanglugos sa 24-anyos nga enhinyera ug sa laing enhinyera sa MEPZA tulo ka semana na ang nakalabay. Ang unang biktima pareho sa ikaduhang biktima nga gikuhaan usab og laptop ug cellphone.
Ang 24-anyos nga biktima gidala sa Pink Room sa Vicente Sotto Memorial Medical Center, sumala pa ni SPO3 Editha Patalinjug, hepe sa Women’s Desk Section. – BANAT NEWS