Poor Clare padayong nanawat og hinabang

CEBU, Philippines - Sulod sa 34 ka tuig, ang Poor Clare Community sa Tayud sa Consolacion,Cebu pabiling nag-ampo alang sa kaayuhan sa katilingban. Sa pagkakaron nag-okupar sila sa usa ka gamay’ng luna sa sulod sa Missionary Society of the Philippines sa karaan niining building nga gikaon na og anay ug agup-op.

Ang superyora sa Poor Clare Community, Sr. Teresita B. Bajarias,OSC, misuwat niining hangyo sa mga malumong kasing-kasing sa mga bumabasa sa pagtabang sa ilaha karong suliran sa kagabok ug kapeligroso na sa edipisyong gipuy-an karon.

“I took all this courage to write this letter on behalf of my community regarding our very urgent need. Our present concern is our receiving quarters, which has not been spared by the termites (anay) and whose ceilings and roofs have started to fall apart,” matud pa niini.

Mas grabe ang ilang kalisod karong panahon sa ting-ulan ug karon nahimo nang peligroso sa mga bisita sa monasteryo nga manganha aron magpamalandong ug magpatambag.

Tungod sa maong giatubang nga suliran, nagproblema karon ang maong komunidad kun diin mokuha og pundong magamit sanglit nagsalig ra sila sa limos ug donasyon.

Nasayod ang maong pundok sa krisis karon apan malaumon silang duna pa gihapoy mohatag og hinabang kanila. Plano sa grupong sugdan ang pag-ayo sa edipisyo tulo ngadto sa unom ka bulan karon kun makatigom na sila og pundong ipalit og materyales. Alang sa mga interesadong mopadala og hinabang mahimong motawag sa telepono 424-8983. -  BANAT NEWS