Militante mag-petisyon vs. military

CEBU, Philippines - Nanawagan ang mga sakop sa youth organization sa militar ug kapolisan nga buhian sa bilanggoan ang gidakop nga mga batan-on niadtong Domingo sa gabii sa sitio Pulangyuta sa barangay Mayabon lungsod sa Zamboanguita, Negros Oriental nga gidudahang mga sakop sa New Peoples Army.

Sa press conference kagahapon sa buntag ang gihimo sa mga sakop sa Cebu Editors Guild of the Philippines, Student Alliance for Nationalism and Democracy, Anakbayan ug Kabataan Partylist.

Ang maong mga pundok mikwestyon sa pagdakop sa militar nila ni Karlo Cabahug, Maria Carla Alvarico ug Glenn Absin Felamir gidudahang mga sakop sa rebeldeng NPA nga naglihok sa Negros. Ang grupo mihimakak mga sakop sa NPA ang tulo.

Ang mga tinun-ang sakop sa CEGP nga sila si Nathaniel Archival, Patrick Tores ug Paul Murillo, deputy secretary general sa CEGP mipadayag nga mopahigayon sila og signature campaign sa ilang tagsa-tagsa ka tunghaan timaan sa ilang suporta nga dili mga rebelde ang tulo ka mga dinakpan.

Ila kining ihatud ngadto sa Zamboanguita Police Station sunod semana ug ila usab tagaan og kopya ang militar, kapolisan, ug ang piskaliya sa Negros, nagplano usab silang modangop sa Kongreso aron ma-imbestigar ang hitabo.

Ang militar nakakuha og .38 revolver ug subersibong dokumento, medical kit ug uban pa sa encounter site ug pagkasunod adlaw napalgan ang patay’ng lawas ni Rayden Carpentero.

Matud pa nila nga nagbakasyon lang ang tulo tungod kay semestral break naman karon. Apan si Lt. Col. Oscar Lasangue sa 3rd Civil Relations Group una nang namahayag nga matag bakasyon mao say pag-adto sa mga bag-ong recruit sa NPA gikan sa mga unibersidad nga magpakaaron-ingnong mag-medical mission, educational tour ug uban pa.  - Rey Pasaporte (BANAT NEWS)