Tomas andam makig-uli si Sonny, Totol ug Cuenco
CEBU, Philippines - Andam makig-uli si Mayor on-leave Tomas Osmeña ngadto sa iyang taud-taud nang gikabangi nga ig-agaw nga si kanhi Senador Sonny Osmeña.
Ang mayor wala usab makakita og problema kang Atty.Aristotle Batuhan nga kanhi sakop sa local opposition party nga Kugi Uswag Sugbu (Kusog).
Labaw sa tanan, andam usab makig-uli si Osmeña kang Kongresista Antonio Cuenco nga iyang gipalagpot gikan sa ilang partido nga Bando Osmeña Pundok Kauswagan (BOPK).
Ang mag-agaw’ng Osmeña ingon man sila si Cuenco ug Batuhan, pulos na mipadayag pagsuporta sa kandidatura ni Senador Benigno Simeon Noynoy Aquino pagka-presidente sa 2010 elections.
Gitataw hinuon sa mayor nga siya andam lang makig-uli sa mga personalidad nga iyang gikabangi kun kini dili modaut sa South Road Properties (SRP).
“Wa man koy problema bisan kinsa diha basta dili lang sila mobunal sa akong mga proyekto labi pang SRP, dili man na personalan akong gigamit,” sumala ni Osmeña.
Bisan wala mabalaka sa kasong gipasaka sa mga opisyal sa probinsya labot sa Filinvest deal apan kini gikasubo gihapon kini ni Osmeña.
“Dili lang ko ganahan nga bunalan atong proyekto kay dako kaayo atong gi-expect, nag-agwanta ta og pila ka tuig unya namunga na gyud ang akong gitanom nga mangga, nakakwarta na ang siyudad, unya ilang gibunalan ang proyekto,” matud sa mayor. – BANAT NEWS
- Latest
- Trending
