Duha ka pusher og shabu sikop

CEBU, Philippines - Duha ka mga babaye kinsa mga suspetsadong tigpamaligya og shabu usa kanila mabdos gisikop sa mga sakop sa Provincial Anti-Illegal Drugs Special Operation Task Group (PAID-SOTG) didto sa sitio Tunga, barangay Tanke, dakbayan sa Talisay kagahapon sa buntag.

Ang mga suspetsado mao sila si Elsa Cabantogan alyas “Elvie”, 42,- ug Maylen Toreon, 29, kinsa usa ka mabdos, nga pulos taga Tunga.

Ang team nga nakasikop sa maong mga suspetsado sa ronda nga ilang gipahigayon gilangkuban nila ni Superintendent Larson Dichino, SPO4 Ernesto Navales, SPO1 Isaias Cabuenas, SPO1 Benjamin Sabelleta, PO3 Leo Susvilla, PO2 Charles Gomez, PO2 Allan Almoharias ug PO2 Andrew Rellenas. Ang nahisgutang mga polis nagdala na og search warrant nga giluwatan nila ni Regional Trial Court (RTC) Judge Paredes sa Branch 13 ug Judge Silvestre Maamo Jr. sa Branch 17 sa ilang pagsikop sa mga suspetsado.

Nakuha sa mga polis gikan sa balay ni Cabantogan ang duha ka medium, usa ka gamay, ug duha ka miniature nga mga paketeng shabu, salapi nga nagkantidad og P5,000 nga gituohang halin sa ginadiling drugas, tulo ka cellular phone nga gituohang gigamit sa ilegal niining kalihukan ug duha ka basiyong mga plastik nga giingong gamiton sa pagputos og shabu.

Kahinumdoman nga niadtong buwan sa Hunyo niining tuiga si Cabantogan nasikop sa mao gihapong kalapasan apan nakagawas kini human makabayad og piyansa.

Si Cabuenas kinsa nahinabi sa Banat News mibutyag nga si Cabantogan anaa na sa watch list sa Cebu Provincial Police Office (CPPO) ug base sa ilang nahipos nga report makabaligya kini og 14 ka bultong shabu matag semana sa tag P35,000 matag bulto.

Sa laing bahin, si Toreon boluntaryong mihatag ngadto sa kapolisan sa 33 ka gagmay’ng paketeng shabu, mga basiyong plastik nga gituohang gamiton sa pagputos sa ginadiling drugas, usa ka digital weighing scale, stainless sealer, gunting ug tulo ka lighter. Ang kapolisan mibutyag nga base usab sa ilang nahipos nga report si Toreon makabaligya og upat ka bultong shabu matag semana.

Ang duha ang mag-atubang sa kasong kalapasan sa Akta Republika 9165 kon “Comprehensive Dangerous Drugs Act” ug nagkagulkol na karon sa prisohan sa Talisay. - Brenda D. Batuto (BANAT NEWS)