CEBU, Philippines - Pormal nang gipasaka ngadto sa Ombudsman Visayas ang awhag pag-imbestigar sa gihulagway nga “basketball corruption” sa amihanang distrito sa dakbayan sa Sugbu.
Si barangay kapitan Mary Ann Delos Santos sa barangay Lahug misang-at kagahapon sa maong awhag sa buhatan ni Ombudsman Pelagio Apostol inubanan sa pagsumitir sa mga dokumentong nadawat kabahin sa pagpalit sa 78 ka basketball boards ug 38 ka lighted panaflex.
Ang gisumitir nga dokumento mao ang Purchase Request nga may petsang Pebrero 26, 2009; Abstract of Bids as Read nga may petsang Marso 23, 2009; Notice of Award nag may petsang Abril 8, 2009; Purchase Order nga may petsang Abril 13, 2009; Obligation Request nga may petsang Abril 15,2009; Inspection and Acceptance Report nga may petsang Abril 16, 2009 ug ang Charge Invoice nga may petsang Abril 16, 2009.
Si Delos Santos una nang mibutyag niini niadtong milabay'ng semana human makadawat og envelop gikan sa usa ka Romalo Tangmuan kansang pagkatawo wala mahibaw-i sa kapitan ug ang sulod mao ang maong mga dokumento.
Matud pa niya dihang iyang gitan-aw og maayo ang maong mga dokumento nagduda siyang kwestyonable kaayo ang presyo sa matag basketball board ug panaflex nga mibalor tanan og P1,442,866.
Ang pagpalit sa maong mga butang gihimo sa Department of Public Works and Highways ug gitagana kini ngadto sa kabarangayan sa amihanang distrito sa dakbayan nga gititulohan og “Improvement of various multipurpose buildings.”
Matud pa sa duha nga sa ilang gastos sa susamang mga boards, ang basketball board mobalor lang og P1,500 samtang ang panaflex mobalor lang og P2 mil ngadto sa P4 mil ang labing mahal ug dili P14 mil o P11 mil.
Miangkon hinuon kining di siya sigurado sa kaligdong sa maong mga dokumento apan isip usa ka public official kinahanglang iyang awhagon ang maong buhatan sa pagsusi niini aron mataral nga mga madiskubrehang hiwing opisyal nga nagbuhat niini. - BANAT NEWS