Nagpatobil gasolina wa bayri

CEBU, Philippines - Gibati og kalisang ang usa ka pump boy sa Easy Gas Convenient Station nga nahimutang diha sa south reclamation road habig sa barangay Cansojong, dakbayan sa Talisay human kini tioni og pusil sa ilang kostumer kinsa nagpatobil og gasolina apan wala mobayad niadtong milabay’ng adlaw.

Si Ruel Ryan Petalcorin ang daling mitaho diha sa Talisay City Police Station sa barangay Poblacion kabahin sa maong hitabo. Base sa imbestigasyon sa mga polis nga niadtong Domingo sa gabii usa ka wala mailhing lalaki kinsa nagsakay og Toyota nga sakyanan nga kolor puti nagtangag sa plakang YCX-401 (temporary plate) ang mimando kang Petalcorin nga pasudlan ang duha ka container niining dala og supreme premium nga gasolina ug human niini mimando usab kini nga patobilan ang iyang sakyanan.

Apan imbes mobayad ngadto sa cashier sa iyang balayronon gitionan na hinuon sa maong lalaki og pusil ang biktima ug mipadagan kini sa sakyanan pahilayo sa lugar.

Sa laing bahin, maayong pagkapusgay sa windshield sa sakyanan sa hepe sa Talisay City Civil Registrar dihang gilabay kini og bato sa wala mailhing lalaki niadtong milabay’ng semana diha sa barangay Tabunok, dakbayan sa Talisay apan ang maong insidente gikataho ngadto sa Talisay City Police Station niadtong Lunes sa buntag.

Ang biktima mao si Gemma Ladion, residente sa maong lugar ug hepe sa nahisgutang buhatan ang mitaho ngadto sa mga polis kabahin sa maong hitabo.

Base sa imbestigasyon sa mga polis nga ang drayber ni Ladion ang nagpahibawo ngadto kaniya nga usa ka wala ilhing tawo sa walay igong rason mibato sa iyang Toyota Innova nga nagtangag sa plakang YGP-976 ug ang bato diha motugpa sa windshield. Human og pamato ang nahisgutang tawo ang daling midagan ug wala na kini masakpi. - Brenda D. Batuto (BANAT NEWS)