Pacaña: Mga bagyo pangandaman

CEBU, Philippines - Gipahinumdoman karon ni Cebu City Councilor Arsenio Pacaña ang City Health Department ingon man ang mga Barangay Health Center nga mopahigayon og health consciousness information drive sa kabarangayan sa dakbayan.

Lakip nga giawhag sa konsehal sa paghimo sa maong kampanya mao ang Department of Education (DepEd) partikular na ngadto sa ilang mga tinun-an.

Kini human usab ipahibawo sa PAGASA nga duha sa gibana-banang upat pa ka umaabot nga bagyo sa Pilipinas ang mohulga sa Kabisay-an nga naglakip sa Sugbu. Gani ang nahisgutang weather bureau mipasidaan nang daan sa publiko sa posibleng mga pag-uwan nga masinati sa Kabisay-an mugna sa umaabot nga bagyong Ramil.

Giangkon ni Pacaña nga dili malikayan nga makasinati usab og mga pagbaha sa mga kapatagan sa dakbayan panahon nga dunay mga pag-uwan.

Ang Department of Health (DOH) una nang nipahibawo, nga ang pagbaha maghatag og risgo sa kinabuhi nga naglakip na sa gitawag og water-borne diseases.

Kini ilabi na sa mapundo nga tubig nga posibleng himoong itloganan sa lamok nga magdala sa sakit nga dengue ug ubang water-borne organism nga nagdala og laing matang sa sakit.

Tuyo ni Pacaña nga mapahinumdoman ang City Health, Barangay Health Center ingon man ang DepEd aron matabangan ang DOH sa ilang kampanya.

Giapil sa konsehal pag-awhag ang DepEd nga mopahigayon usab og health consciousness drive tungod kay ang daling matakboyan og mga sakit mao ang kabataan.

Usa ka resolusyon ang ipalabang ni Pacaña sa umaabot nga sesyon sa City Council nga alang sa maong katuyoan. – BANAT NEWS